又到炎炎夏日，晚晚都热到瞓唔着，连风扇吹出嚟嘅风都係热嘅，咁难熬嘅夜晚有乜好去处？梗係去食消夜啦。

　　细细个嗰时，晚晚同老窦、妈子去食消夜。我哋去食消夜唔係真係为着食嘢嘅，其实就係因为天气太热喇，所以落街揾个地方“打扽”，透下凉。树阴之下，间唔中有阵阵凉风，听住蝉叫，都几写意口架。虽然自家一张台，但係隔篱台都係老街坊，所以气氛都好好口架，有时你过下我张台倾偈，有时我过下你张台食嘢，好似包晒成个场噉。

　　好多时我哋都会揾埋啲朋友一齐食嘅，老窦、妈子有佢地啲老友记，佢地老友记啲仔女就係我啲朋友仔嘞。啲大人倾偈好闷口架，从国家大事讲到身边八卦，讲到口干就整翻啖“番鬼佬凉茶”（啤酒），老窦话，透凉，倾偈，加埋“番鬼佬凉茶”，人生一大乐事也。佢哋就梗係乐得过啦，都唔理过我哋咁细个，对佢哋讲嘅嘢一啲兴趣都冇。不过，我地呢班马骝边度会乖乖噉坐喺张凳度啊，开头仲会玩下斗快食螺，但係饮唔够两啖汽水或啤酒，就成堆跑去玩啦。

　　依家咁热，搞到我好挂住食消夜添。但係露天嘅大排档越嚟越少嘞，因为露天嘅多数都係占道经营，而且搞到啲地方好邋遢。一个江南大道嘅大排档老细讲，日头街道嚟，夜晚城管嚟，所以都搞到开唔到档。不过，露天夜宵呢啲咁有广州特色嘅嘢，喺物业小区附近嘅大排档都会揾到嘅，喺热辣辣嘅夜晚，佢真係一个唔错嘅选择。

　　一碟螺、一支啤酒、一张台，露天消夜，我嚟啦……

　　编辑：洪海宁　实习生　潘露